Pruaitch i bin sindaun wantaim ol memba bilong oposisen kem, long taim em i givim toksave i go long Klak bilong Palamen long rausim dispela mosen.
Long wankain taim, Tari-Pori MP James Marape, i rausim bek nominesen bilong em i long kamap Praim Minista.
Long wanpela nius konprens asde, Patrick Pruaitch wantaim James Marape wantaim tu ol arapela memba bilong oposisen kem i tokim ol midia long tokaut long disisen bilong ol long kisim bek mosen bilong Vot I No Gat Bilip long Praim Minista.
“Mi olsem man i muvim dispela mosen, mi rait i go long klak long rausim dispela mosen bilong makim James Marape long kamap Praim Minista. Mipela i lukim olsem mipela i mas bringim bek dispela posisen long kokas na mipela askim ol memba bilong palamen long narapela sait bilong gavman long kam long Oposisen na mipela i ken makim husat tru inap long kamap Praim Minista,” Pruaitch i tok.
Marape i tokaut tu long tingting bilong em long rausim gen nominesen bilong em long kamap Praim Minista na putim antap long tebol long ol narapela kendidet tu.
“Ol i bin makim mi long kisim sia bilong Praim Minista sapos nupela gavman i kamap, tasol nau em i wanpela wik i go pinis bihain long Me 7. I gat planti ol narapela kendidet i stap we inap long kisim sia bilong Praim Minista husat i stap long gavman sait. Olsem na mipela olgeta i wanbel long rausim dispela nominesen. Mi amamas tru olsem mipela i rausim gen dispela nominesen na putim long tebol long ol narapela lida inap long kisim dispela sia.
Dispela disisen long rausim vot i no gat bilip na tu long makim Marape olsem nupela Praim Minista i kamap bihain long kem i pasim tok long painim narapela rot gen long kisim moa namba long rausim O’Neill.
Ol nau i singaut long ol Memba bilong Palamen, ol Minista na ol Pati Lida insait long koalisen Gavman long bung wantaim ol.
“Mipela singaut long husat lida i gat wankain tingting olsem mipela long kam na mipela bung wantaim long kamapim wanpela nupela gavman,” Marape i tok.
Abau MP Sir Puka Temu i tok, “I gat ol Minista we i save long tok tru. Long gutpela bilong ol pipel bilong yumi, mipela askim olsem yumi mas wokim stretpela pasin long lusim Praim Minista na kamapim nupela Gavman.”
I no gat tok i kamap yet olsem bai i o gat nupela mosen bilong Vot I No Gat Bilip. Oposisen i gat 49 MP insait long kem bilong ol.