Dispela projek we ol i bin kirapim long 10-pela yia i go pinis em ol i kolim long Karkum Konsevesen Eria. Em i wok bilong ol Duargo Komyuniti Divelopmen Asosiesen. Ol i raitim na pablisim wanpela buk pinis long wei bilong lukautim ol Komyuniti Marin Eria o hap bilong solwara we ol komyuniti lukautim.
Wok bilong dispela komyuniti i kamap tu insait long wanpela muvi piksa we ol i bin wokim long Yunivesiti ov Goroka.
Ol i bin soim dispela muvi piksa long namba wan taim insait long Pot Mosbi long las wik.
Dispela trosel baksait sel bilong en i olsem let em ol i kolim long Tok Inglis olsem “Leatherback turtle” i kisim nem bilong en long narakain sel bilong en i no strong tumas olsem gumi, em i bikpela kain trosel na em i gat hevi moa winim ol narapela kain enimal olsem.
Tasol dispela kain trosel em i stap long birua bilong pinis olgeta long ples.
Wanpela ples long Madang i wok long go pas long lukautim na banisim ol dispela kain spesel trosel.
Ol asples i tok olsem komyuniti bilong ol i save kisim abus long solwara olsem na ol i mas lukautim ol abus bilong solwara gut.
Dispela projek i bin stat long 2006, na ol komyuniti i yusim mani bilong ol yet long ranim dispela projek.
Man i go pas long helpim dispela komyuniti, Wenceslaus Magun, i bin raitim wanpela buk ol i givim nem, The Turtles Return, em ol i bin autim long las yia.
Dispela komyuniti i bin stap insait tu long wanpela muvi piksa ol i kolim In search for Equilibrium, we ol i bin soim long namba wan taim long Pot Mosbi las wik Trinde.