Gavman i wok long tromoi mani long mak bilong K260 i go long K270 milien long olgeta yia long baim moa long 6,000 ol pablik sevan husat i stap yet long peirol bilong gavman.
Minista bilong Pablik Sevis, Westley Nukundj i bin tokaut long dispela samting i no longtaim i go pinis na em i laikim ol menesmen tim bilong Dipatmen bilong Pesonel Menesmen long painim as bilong dispela paul pasin na stopim nem bilong ol ‘ tewel’ husat i stap long peirol.
Minista bilong Pablik Sevis Westley Nukundj i statim wok pinis long stretim ol dispela hevi bilong gavman pei rol ova-ran we i kamapim wari long ol gavman long nau na bipo wantaim.
Em i tok Gavman i toktok strong long bihainim tingting bilong PPP we taim ‘wanpela man o meri i kisim pe bilong wokim wanpela wok bilong wanpela posisen’.
Nukundj i tok gavman i laikim sampela bekim bilong ol kwesten bilong en olsem bilong wanem na yumi gat ol opisa i no gat posisen na ol i stap long wanem ol dipatmen na ejensi.
Em i makim wanpela taim bilong Dipatmen bilong menesemen tim long givim olgeta gavman ejensi pei rol pastaim long wok i pinis long Mande 29 Julai na givim long ol i ken painim ol narapela rot.
Nukundj i tok moa olsem olgeta dispela toktok i mas stap long ol grup olsem bilong ol lain husat i winim 60 krismas na redi long ritaia o lusim wok na long ol husat i stap long saspensen winim tripela mun.
Em i tok Gavman i no laik traim long daunim kost, nogat. Em i laik kisim wanpela namba we i wok long mekim gut wok bilong en insait long wanpela posisen we gavman i wok long baim.