Ol polis i holim pasim wanpela trabel man husat i bin bagarapim wanpela liklik pikinini meri husat i gat sikispela krismas tasol.
Dispela samting i bin kamap bihain long wanpela man i bin salim toksave i go long Minista bilong Polis, Brian Kramer, long Fesbuk pes bilong en.
Ripot i tok olsem wanpela bikpela man we i bikpela insait long famili bilong dispela liklik meri i bin bagarapim em na mama bilong em i bin putim ripot long Gordon’s polis stesin, tasol ol polis i tok i no gat ol samting bilong ol i ken helpim em.
Minista Bryan Kramer i tok wanpela narapela man nating i wari long dispela na em i putim dispela toksave long Fesbuk we ol i kolim nem bilong Minista.
“Mi askim em sapos em inap long tokim mi ples we mama na pikinini meri i wok long hait,” Minista i tok. “Olsem na em i bin painimaut long dispela long de bihain.”
NCD polis i bin go na kisim mama na pikinini na tu ol i bin holim pasim dispela saspek long de 17 bilong mun Jun.
“Bihain long dispela toktok na tu bihain long ol polis i sasim dispela trabel man, mipela stretim rot bilong mama na pikinini meri long go stap long Bel Isi Meri Seif haus we BSP na Oil Search i bin kirapim i no longtaim i go pinis, wantaim helpim bilong DFAT (Dipatmen bilong Foren Afes na Tred, Australia),” Kramer i tok.
“Mipela kisim ripot i tok olsem ol lain i bin givim pret toktok long mama long em i no ken tokaut long polis long dispela hevi i kamap.
“Long taim mi kisim opis mi tok klia olsem sosel midia bai kamap olsem ples we mipela ken toktok moa wantaim ol pablik long putim was long ol memba bilong polis fos na tu long Memba bilong Palamen,” Kramer i tok.
Minista Kramer i tok dispela em i wanpela kes tasol, na em bai go het yet long wok wantaim Royol PNG Konstebleri long kamapim seif PNG long ol meri na ol liklik pikinini.