PM O'Neill i no sitisen bilong tupla kantri

Praim Minista Peter O’Neill i tok olsem ol toktok bilong Memba bilong Madang Open, Bryan Kramer olsem em i sitisen bilong tupela kantri em i no tru.

“Wanpela giaman nius bilong Kramer i gen kamap olsem mi wanpela sistisen bilong Australia.

“Mi no bin kamap sitisen bilong wanpela narapela kantri bipo. Mi sitisen bilong Papua Niugini tasol bikos mama karim mi long Papua Niugini,” Praim Minista Peter O’Neill i tok.

“Mama karim mi long wanpela liklik bus ples ol i kolim Mamuane, klostu long boda mak bilong Galp na Sauten Hailans provins.

“Mi amamas olsem ol pipel bilong mi i lukautim mi long hap. Mi no nidim narapela moa sitisen nem bilong kisim luksave long mi husat.

“Dispela kain Fesbuk lida, Kramer i wok long traim hat long kamapim nem bilong em yet na i no sem long kamapim ol kain giaman nius,” em i tok.

Memba bilong Madang, Bryan Kramer i putim nius long sosel midia Fesbuk na i tokaut olsem Praim Minista O’Neill em i wanpela sitisen bilong Australia na tu olsem em i gat wanpela paspot bilong Australia.

Kramer i tok olsem Praim Minista O’Neill em i brukim lo long kamap Memba bilong Palamen na em i no bihainim lo tu long kisim opis bilong Praim Minista bilong Papua Niugini.

Tasol, Praim Minista i tok ol dispela kain toktok em i no tru olgeta. Em i tok strong yet olsem em i no wanpela sitisen bilong Australia.

Author: 
Freddy Mou