Dispela tupela rot bilong nius i bilong Digicel Media Ventures, nius han bilong Digicel PNG.
Digicel PNG CEO Colin Stone i tokaut olsem tingting bilong tanim nius long Tok Inglis i go long Tok Pisin, em i soim laik bilong Digicel PNG long bringim ol nius i go long moa pipel bilong PNG. Em i bikpela samting long Digicel tanim nius long Tok Pisin long em i ken go klostu long ol pipel.
“Nius long PNG i save go long ol lain husat inap long toktok na ritim Tok Inglis tasol. Tasol mipela i luksave olsem planti ol pipel bilong Papua Niugini i save yusim Tok Pisin moa long toktok i go i kam. Olsem na em i stret long mipela i opim dua long givim sans long wanpela bilong ol bikpela tokples bilong PNG.”
Loop PNG olsem midia onlain o intanet midia sevis bilong Digicel PNG nau i gat moa long 7,000 manmeri i save ritim nius long wan wan de. Digicel PNG i gat bikpela tingting olsem nius long Tok Pisin bai kisim moa pipel bilong PNG long ritim ol nius long dispela rot bilong nius.
Stone i tok moa: “Mipela bai go het yet long givim ol strongpela nius we i sut stret long laik na tingting bilong ol kastoma bilong mipela long olgeta hap bilong PNG. Dispela i makim nupela lekmak mipela kisim long wokabaut bilong mipela.”