Atoni Jeneral, Alfred Manase, i rausim gen aplikesen long stopim Palamen na Praivet Bisnis Komiti long kisim wanpela mosen bilong vot i no gat bilip long kamap.
Loya bilong Manase, John Griffin, i bin kisim bek dispela aplikesen aster long taim tripela Suprim Kot jas, Jastis Derek Hartshorn, Collin Makail, na Oagile Bethuel Dingake i sindaun long harim.
Long Me 15 Manase i bin redim wanpela Aplikesen long stopim Palamen na Praivet Bisnis Komiti long harim wanpela notis bilong mosen bilong vot i no gat bilip (VONCM) we Oposisen i bin kamapim long Me 7.
Tasol Lida bilong Oposisen, Patrick Pruaitch i bin rausim pinis VONCM long Mande Me 20, wantaim James Marape, man husat ol i redim long kisim sia bilong Praim MInista.
Tripela jas i tok em i no stret long kot i mekim disisen nating long wanpela samting we i no kamap yet, bikos oposisen i rausim gen VONCM.
Pastaim long spring kot jas i harim toktok bilong Stopim mosen, Spika bilong Palamen i askim long kot i no ken harim dispela aplikesen.
Ol loya bilong Manase i askim long kot bai lusim inap Trinde 29 Me long harim dispela aplikesen, em wanpela de bihain long Palamen i sindaun gen. Tripela jas i no wanbel long aplikesen bai i stap inap dispela taim.
Long wankain taim, dispela tripela man jas i tok nogat long aplikesen bilong Oposisen Lida, Patrick Pruaitch, na Sedo Atoni Jeneral, Kerenga Kua, long mekim senis long Spring Kot Refrens (SCR) 5 bilong 2018 asde long apinun.
SCR5 bilong 2018 i askim Spring Kot long tok klia long lo bilong vot i no gat bilip mosen, ol pawa bilong Spring Kot long mekim senis long ol wok bilong Palamen i bihainim lo o nogat, na tu long pasim bilong makim Praim Minista i mas kam long wanpela pati we i gat moa namba.