PNG Power Bod ov Dairekta i makim Douglas Mageo olsem Ekting Sif Ekseketiv Opisa bilong PNG Power Ltd, bihain long Carolyn Blacklock i bin risain long Fonde olsem ekting Menesing Dairekta bilong PNG Power.
PNG Power Bod ov Dairekta i holim wanpela spesel miting long Oges 30th long makim Ekting Sif Ekseketiv Opisa bihain long Carolyn Blacklock i tokaut long lusim wok bilong en.
Bod Siaman Peter Nupiri i tok tenk yu long gutpela wok bilong Blacklock wantaim PNG Power insait long 18 mun em i bin wok na i tok moa olsem em i save long wanem as Blacklock i mekim disisen long risain.
Bod i tok tenk yu long Blacklock long gutpela wok bilong en long stretim ol hevi na kamapim Rifom Asenda bilong PNG Power, wantaim Plen bilong Pawa i we i gat liklik kost.
Tasol Nupiri i tok nogat wanpela ogenaisesen inap wok taim i no gat bos olsem na bod i makim nau Douglas Mageo olsem Ekting Sif Ekseketiv Opisa.
Bod siaman i tok Mageo i no nupela long dispela sia. Em i bin stap olsem ekting CEO pastaim long Blacklock i kam insait. Em i gat save bilong wok we em inap long givim lidasip long dispela taim.
Em i tok ol bai statim wok bilong makim nupela Dairekta hariap tasol, na ol i toktok wantaim ol seaholda, Kumul Consolidated Holdings Limited (KCHL), na wok klostu wantaim ol na ol Minista long makim nupela man o meri klostu taim.