Ol sios sapotim driman bilong PM

Ol sios i tok olsem ol bai sapotim Praim Minista James Marape.

Ol sios lida bilong Bodi bilong Krais i no westim taim long givim wanpela pepa bilong petisen o bikpela askim i go long Praim Minista James Marape, taim em i bin kamap long De bilong Pre na Tok Sori long Ogas 26.

Siaman bilong Bodi bilong Krais, Reveren Joseph Walters, i makim ol sios na givim dispela ol askim i go long Praim Minista Marape.

Pastaim long em i givim dispela sikispela bikpela askim, Reveren Walters i tokim Praim Minista olsem ol sios i redi na sanap baksait long strongim dispela visen o driman bilong em long mekim Papua Niugini kamap namba wan blekpela Kristen kantri long kamap  kantri we i gat inap mani long lukautim em yet. Tok Inglis, “First black richest Christian nation”.

“Mipela laik tok promis long yu olsem long driman bilong yu, ‘First black richest Christian nation’, olsem mipela ol sios i wanbel long dispela driman bilong yu. Mipela tok promis olsem mipela bai givim yu pul sapot long kamapim tru dispela visen long sait bilong Kristen,” Walters i tok.

Em i givim ol dispela petisen long pepa i go long Praim Minista:

  1. Gavman mas givim luksave long Israel olsem em i as bilong Kristen bilip. Olsem buk baibel i kam long dispela hap na tu Sevia bilong wol i kam long en;
  2. Gavman i mas kamapim nupela dipatmen long lukautim ol sios na i no ken stap olsem hap bilong Dipatmen bilong Komyuniti Divelopmen Yut na Sios;
  3. Gavman i mas putim wanpela lotu lidaman insait long ol gavman stetutori bodi na dipatmen long bringim tingting bilong God i go insait;
  4. Gavman i mas makim saplin bilong palamen haus na tu ol dipatmen na ol stetutori bodi;
  5. Kamapim lo we bai banisim 400 yia baibel nau i stap long palamen semba long em i mas stap insait long dispela hap olgeta taim bihain; na las tru em
  6. Gavman i mas mekim senis long Mama Lo we bai soim olsem Papua Niugini em i Kristen kantri stret. Em i minim olsem baibel em i kamap lo na wanem samting i ausait long baibel em i ausait long lo.

Prime Minista Marape i bekim toktok bilong ol sios na em i tok olgeta dispela askim em i no hat long kamapim. Bihain em i givim ol dispela askim i go long Deputi Praim Minista na Atoni Jeneral, Davis Steven, husat i minista lukautim sosol sekta long em bai lukluk long ol dispela askim.

Marape i tok tu olsem i gat pas i go pinis long Israel long karim embesi na misin bilong Papua Niugini i go long Jerusalem tasol gavman bilong Israel i bisi long ileksen na ol i no bekim tok yet. Tasol ol i gat plen long go long Israel na toktok moa.

Marape i tok olsem ating long yia bihain long wankain taim bai sampela bekim i redi pinis long ol dispela askim.

Author: 
Frieda Kana