Ol NCDC lika o bia laisens inspekta i go raun long Faiv Mail long Wednesde moning taim wantaim polis eksot.
NCDC senia lika laisens opisa, Irish Boroba, na Mosbi Saut Inspekta, Tom Kamtai, i raun i go long Faiv Mail setelmen aninit long polis eskot wantaim ol nem list bilong olgeta lika o bia stua long lukim sapos ol i gat laisens o nogat. Olsem Boroba i tok, ol i wok long stretim list bilong 2017, we ol i bin givim ol toksave long ol bia stua pinis.
Ol pipel long namba wan hap we Inspekta Kamtai i bin lukluk raun, i bin kirap nogut tasol ol i amamas na tok welkam long em. Long dispela taim inspekta Kamtai i mekim ol toksave bilong ol iligal bia treid na tu long ol wok bilong Nesenel Kapital Distrik Komisen.
“NCDC em atoriti we em kontrolim siti,” em i tok.
“Divelopmen blong siti em NCDC kontrolim, na wanpla blong displa em lika laisens we NCDC kontrolim.
“Yu husat man i gat stua na yu tingting long wokim mani long salim bia, yu mas kam pastaim long NCDC na kisim laisens. Mipla tasol mipla atoriti i stap long siti long kontrolim lika laisens. Yu kisim laisens long sampla kain hap stap, em rong blong yu yet nau. Lo bai kam na mekim save long yu.”
Faiv Mail komyuniti lida, Buckley Dama, i laikim NCDC long daunim mak long salim bia long ol setelmen bikos ol i les pinis long pasin bilong spak, wokim nois na distebim ol narapela na tu long wokim stil pasin. Em i toktok moa long bisnis aua bilong 5-Mail Wait Haus.
“Mi save toktok na kontrolim ol spak man na meri go na, mi tingim seifti blong ol meri, pikinini na sampla ol Kristen stap, sampla ol skul pikinini stap. Yupla ol atoritis, ating kontrolim displa Wait Haus.”
Bihain long dispela hap, ol inspekta i go long wan wan ol stua long lukim sapos ol i gat trupela laisens o nogat, na husat i papa bilong ol dispela stua, na ol i givim toksave long ol lo bilong lika laisens bod na givim tingting long ol i ranim gut ol bisnis bilong ol.
Sampla ol stua i gat giaman setifiket na planti tu i no gat laisens olgeta olsem na ol i givim ol notis o toksave bilong stopim bisnis bilong salim o baim bia na salim gen, long ai bilong ol polis. Ol bai givim nem bilong ol dispela iligel o blek maket stua long olgeta lika distributa.
Sinia lika laisens inspekta Boroba i tok klia olsem sapos ol dispela stua i no bihainim toktok bilong em, ol bai wok wantaim polis long mekim ol i mas bihainim ol lo bilong NCDC.
Taim em i bung wantaim ol stua kipa na ol papa bilong stua, em i tok klia long rot bilong kisim lika laisens em i mas gat tok orait bilong fisikel plening na bilding bod. Ol bai toksave sapos ol dispela lain stua i stap long ples bilong ol manmeri save slip o nogat, na tu sapos ol i bihainim gut lo bilong bilding bod.
Moa long en, ol lain i aplai long kisim laisens bai lika laisensing bod i putim nem bilong ol long ol niuspepa, long ol komyuniti bai givim tingting bilong sapos ol i laikim wanpela bia stua i sanap klostu long hap ol i save stap o nogat.
Long dispela taim tu, ol sampla stua we i no gat laisens long salim bia i bin pasim ol bia stua bilong ol taim ol i harim olsem NCDC na polis i stap long hap bilong ol. Ol inspekta tok olsem ol bai mekim sampla moa inspeksen na long kisim ol lain i brukim lo sampela taim bihain.