Minista tok nogat long salim NHC haus

Bai i gat wanpela stop oda bilong salim olgeta propeti bilong Nesenel Hausing Kopresen inap long taim ol i kisim namba bilong olgeta samting bilong NHC nau i stap.

Minista bilong Hausing na Ebenaisesen, Justin Tkatchenko, i tokaut long dispela tude long taim em i senisim ministri opis wantaim bipo minista, John Kaupa.

Ol minista insait long Marape-Steven kebinet bai gat sikispela mun long mekim wok strong long stretim ol wok bilong ol, long wanem ol bai i mas soim gutpela wok bilong ol insait long dispela ol mun.

Minista Tkatchenko i stopim wok bilong salim ol samting bilong NHC na tu long rausim ol famili husat i stap long ol dispela haus nau.

Em i tok olsem stat long Trinde, ol bai stopim olgeta wok bilong salim ol haus na ol narapela propeti insait long kantri. Ol i mekim olsem long save gut hamas aset olsem ol hap graun na ol haus em Nesenel Hausing Kopresen i gat.

 “Mi mas save long dispela samting,” em i tok.

“Na bai nogat wanpela man i raus long haus, nogat tru. Husat man i laik traim long rausim wanpela man nating bilong Papua Niugini insait long haus bilong em bai kisim taim,” em i tok moa.

Ol bai statim wok bilong givim nating haus tu.

“Mi laik lukim dispela samting i kamap pastaim long dispela yia i pinis. Ol dispela haus we i stap long ‘givaway skim’ bai i go stret long ol pipel husat i nidim tru na i wet long planti yia i go pinis. Yumi mas mekim dispela samting i kamap long ol pipel bilong yumi husat nem bilong ol i stap long dispela ‘givaway skim’,” Mista Tkatchenko i tok.

Tkatchenko i tok olsem ol manmeri husat i no save kisim bikpela pei tu bai i ken gat gutpela haus.

“Praim MInista i tokim mi olsem em i laik lukim ol lain husat i no save kisim bikpela pei, olsem 80 pesen bilong ol pipel long kantri, long i gat gutpela haus long kost we ol inap long baim. Em bai namba wan wok mipela bai wokim.

“Mi laik long kamapim dispela wantaim nupela Minista bilong Lens, John Rosso. Em bai wok wantaim mi long painim ol graun insait long kantri long kirapim ol haus i no gat bikpela kost bilong ol.”

Nesenel Hausing Kopresen i bin painim planti hevi insait long ol yia i go pinis. Ol i bin salim planti ol propeti nating long Durand fam na ol narapela dinau bilong ol tenen long ol propeti bilong hausing.

“Nesenel Hausing Komisen i gat bikpela salens olsem yumi save pinis olsem i gat bikpela bagarap insait. Em i bikpela hevi na gutpela brata bilong mi John Kaupa i traim hat long stretim taim em i bin stap long hia,” Tkatchenko i tok.

Long wankain taim, Kaupa i tok: “Mipela i no malolo long wok, na mipela bin hatwok stret. Insait long Hausing Kopresen i stap bagarap tru hia. Tasol mi bin klinim aut sampela bilong ol, mi ting bai brata bilong mi i ken kam na pinisim ol narapela.”

Author: 
Sally Pokiton