Minista bilong ol graun, John Rosso, i tok wanpela namba wan samting em bai wokim em long kisim bek ol graun bilong gavman we ol stilman i holim i stap long Lae, Morobe Provins.
Em i tok pasin bilong stilim nating graun em i kamap bikpela long Lae na nau Minista i laik lukluk long en.
“Mipela bai lukluk long Lae long sekim ol stilman bilong graun. Bai mipela sekim ol fail bilong ol, mipela bai lukluk long olgeta pak o ples bilong stap malolo na ol narapela hap bilong gavman long Lae. Em bai namba wan wok mi bai wokim long kisim bek ol samting bilong gavman long wei bilong lo,” Rosso i mekim dispela toktok long taim em i kisim opis long Tunde dispela wik.
Minista Rosso bai wok klostu wantaim Minista bilong Hausing na Ebenaisesen, Justin Tkatchenko, long givim taitel bilong graun long ol asples lain husat i stap long ol Nesenel Hausing Kopresen haus.
Mista Rosso bai statim wok bilong en long Tunde wik bihain.