Jastis sekta i tokaut long dispela wik olsem ol bai wok bung wantaim long daunim dispela sik korapsen.
Seketeri bilong Dipatmen bilong Jastis na Atoni Jeneral, Dr. Erick Kwa, i tokaut long taim bilong TIPNG Wokabaut Egensim Korapsen olsem, dipatmen i stretim lo pinis long kirapim Independent Commission Against Corruption o ICAC.
Long wankain taim, Deputi Komisina bilong Polis Operesen, Jim Andrews, i tok Polis Fos i gat Intenel Afeas Dairektoret we i gat ol opisa long wok wantaim ICAC.
Ekting Komisina bilong Koreksenel Sevis, Stephen Pokanis, husat i bin stap tu long dispela wokabaut i bin tok olsem dipatmen bilong em i gat tupela rot bilong pait long korapsen. Namba wan em long Prison Sapta na narapela em long Intenel Afeas, wankain olsem Polis Dipatmen.
Transparensi Intenesenel PNG we i go pas long holim dispela wokabaut ol i kolim “Sir Anthony Siaguru Walk Against Corruption”, i bin kamapim mani long mak bilong K165,000 insait long dispela wokabaut long Sande dispela wik, long Pot Mosbi.
(Ol bikman bilong lo na jastis go pas long mas. Long han kais i go long han sut: Seketeri bilong Jastis na Atoni Jeneral Dr Eric Kwa, TIPNG Siaman, Lawrence Stephens, sumatin bilong De La Salle Sekenderi Skul, Ekting Koreksenel Sevis Komisina, Stephen Pokanis na Deputi Polis Komisina Operesens Jim Andrews. Poto: TIPNG Media)