YWAM Medikol Sip i no save bringim helt sevis tasol long ol ples i stap longwe, nogat, em i save mekim wanpela bikpela wok tu long trenim wokfos bilong PNG.
PNG petron bilong medikol sip, Sir Rabbie Namaliu, i bin mekim dispela toktok antap long MV YWAM PNG bihain tasol long em i lusim Townsville na kamap long Pot Mosbi.
Insait long 2018 enuel ripot bilong en, YWAM Medikol Sip i tokaut klia olsem em i save mekim planti wok bilong strongim helt wokfos bilong PNG na moa long ol rurel eria. Ol wok bilong en i stap moa long kamapim save bilong ol yangpela Papua Niugini manmeri husat i stap insait long program long ol narapela wok we i no bilong lukim sikman na givim marasin.
Taim em i toktok moa long dispela, PNG Patron Sir Rabbie i tok ol i gat wanpela patnasip wantaim UPNG Medikol Skul we i save larim ol sumatin o greduet long go long sip na lainim wok aninit long ol kwalifai medikol profesenel.
“Samting we ol i no inap mekim long Papua Niugini bikos ol bai i no stap long hia,” Sir Rabbie i tok.
“Tasol dispela em i wanpela gutpela program na em i givim ol sans tu long ol, sapos ol i laik kam wok long sip na mekim voluntia wok inap long wanem kain taim ol i laikim long stap. Na planti blong ol i kisim dispela sans long mekim.
“Tasol olgeta wokman na wokmeri bilong mipela em ol voluntia. Dispela i kam long kepten i go long CEO i go long ol pipel i wok antap long sip taim sip i go aut na mekim wok autris.”
Long 2018, YWAM Medikol Sip i wokim namba wan autris bilong en i go long Finschhafen Distrik, long Morobe. Dispela i kamapim bikpela samting long strongim helt wokfos.
YWAM Medikol Sip ripot i tok olsem Braun haus sik i gat planti wokman na meri husat i laikim moa trening long kisim save bilong wok olgeta taim, na tu ol komyuniti helt woka (CHW) skul i gat planti sumatin husat i hamamas long statim wok bilong ol long helt kea long dispela wei.
Forti nain (49) bilong ol dispela sumatin i bung wantaim YWAM Medikol Sip komyuniti wok tim insait long namba wan wik bilong autris.