Bisop Bernard Unabali, Bisop bilong Daiosis bilong Bogenvil husat i bin sik na i go long Manila, Filipins i lusim laip pinis long Oges 10.
Asbisop Frances Panfilo bilong Asdaiosis bilong Rabaul na Metropolitan bilong Niugini Ailans i tokaut long dai bilong Bishop Bernard Unabali.
Asbisop Panfilo i raitim wanpela pas i go long Katolik Bisop Konprens sekreteriet long Pot Mosbi na i tok: “Bel bilong mi i hevi na wantaim bikpela sori wantaim mi tokaut long dai bilong gutpela brata bilong mipela, Bisop Bernard Unabali, Bisop bilong Daiosis bilong Bogenvil.
“Bisop Unabali i dai long 1.49 apinun long St. Luke’s Haus sik long Manila, Filipins, we ol i bin kisim em i go las wik Sande.
“Ol lain husat i bin stap wantiam em long taim em i pasim ai em Fr Beejay, MSP, wantaim ol narapela pater na sampela PNG sista.
Sr. Daisy Lisania, MSC, i tok long dai bilong Bisop Bernard Unabali olsem dai bilong em i bin isi. Pastaim long em i dai, em i tokim Fr. Bill John olsem: ‘Mi bin stap wan wanpela naispela ples insait long driman bilong mi’.
“Em nau i stap long dispela naispela ples we ‘bai nogat moa dai, haus krai na pen, ol samting bilong olpela graun i go pinis.” (Kamapim Tok Hait 21:4).
Asbisop Panfilo i givim tok sori bilong em long famili bilong Bisop Bernard, ol misineri o ol relijes manmeri na ol pipel bilong Bogenvil na prea bilong em long ol.
Moa toksave bai kam long Vika Jeneral bilong Daiosis bilong Bogenvil, Fr. Ploycarp Kaviak, long wokabaut bilong bodi bilong Bisop Bernard Unabali bihain.