Ol investa i mas gat inap mani

Ol investa husat i kam long PNG i mas gat inap mani stat long mak bilong K10 milien.

Dispela em toktok bilong Praim Minista James Marape we em i givim long Australia long lukluk raun bilong em long dispela mun.

Praim Minista i bin kamap long Jackson’s Intenesenel VIP Teminel long Mande 29 Julai bihain long em i pinisim wokabut bilong em long Australia.

Em i bin tokim ol nius manmeri olsem em i bin mekim planti toktok olsem pasin bilong treid i no save wankain, long kamapim gut local ikonomi bilong PNG, toktok bilong Manus Asailum, na tu em i bin lukim long ai bilong em yet long ol wei ol local indastri bilong Westen Australia i save mekim wok.

Long Fraide Praim Minista i bin toktok long moa long 300 investa long Sydney, we em i tok ol i gat laik long wok insait long PNG.

“Na yumi salim kantri bilong yumi olsem wanpela gutpela ples bilong invesmen tasol long wankain taim tu, yumi mekim klia ol kraitiria bilong yumi. Ol investa husat i laik kam ol i mas gat gutpela mani inap long K10 milien na i go antap, long ol inap long putim i go insait long Sentral Benk bilong yumi long soim olsem yu wanpela trupela investa,” em i tok.

“Olgeta lain long Australia i save olsem mipela i gat gutpela ples bilong invesmen; ol i gat moa long 5,000 bisnis, em ol rejista Australia bisnis, na tu ol i gat rejista opis long kantri bilong yumi olsem na ol i gat save long wanem kain stori yumi gat.

“Sapos yu gat gutpela na strongpela ikonomi long PNG we ol pipel i amamas, em bai ol bisnis husat i stap wok long dispela kantri bai i gat seif adres long nau na long bihain taim tu.

“Na mi tokim ol tasol olsem; Tenpela yia bihain mipela i no laik long kisim yet helpim long yupela. Mipela laik kamap wok poroman bilong yu long salim helpim i go long ol narapela kantri husat i no gat planti samting insait long Pasifik we ikonomi bilong ol i liklik tumas na ol i wok long bungim birua bilong klaimet senis we solwara i wok long kam antap long ples bilong ol.

“Mi ting olsem dispela toktok i kisim gut ol pipel bilong Australia, ol Australia midia, wantaim Australia gavman na ol bisnis bilong Australia. Nau ol i lukim yumi olsem yumi bikpela mangi.”

(Praim Minista James Marape wantem ol Minista blo em lo Jackson’s Intenesenel VIP Teminel)

Author: 
Carmella Gware